LEGO机动海盗船真係识郁港人设计等你投票

2020-06-07

LEGO Idea畀玩家将自己嘅设计变成现实，玩家将自己嘅设计放上网畀全球LEGO爱好者投票，如果限时内有足够票数，LEGO经审核及改动后就会将推出市场，变成正式产品。最近笔者发现一位本地LEGO迷将个好正嘅设计放咗上LEGO Idea，值得各位玩具玩家支持！

记得LEGO曾推出摩天轮套装，只须轻轻改装就可以自行转动，非常吸引，首批水货到港时炒贵足足一倍。最近有位本港LEGO迷兼巴打Ken设计出可动机动海盗船，放上LEGO Idea畀大家投票，只要够一万票就会俾LEGO审批。话就话Ken係巴打实有分加，但海盗船本身先係重点，于是笔者冒住被起底嘅危险，亲身去访问Ken同睇实物。原来Ken玩LEGO嘅日子唔长，大约只有半年，但呢只海盗船已经係佢第二次递交上去嘅设计。

◆ 阿Ken同佢亲自设计嘅LEGO海盗船。

◆ 后面机动组设计成一间屋仔咁。
◆ 船上面啲玩家表情丰富！
◆ 售票处有咁多人嘅？
◆ 最奇係佢侧边仲有间卖热狗嘅舖仔，谂住啲人玩完呕完会想食嘢？

**由于现场光线关係，部份相片由Ken放上嘅LEGO Idea页面撷取，如大家想再睇真啲亦可以上去佢另一个相簿睇睇。

「我之前设计咗架火车放上去，但最后冇乜人理，所以我把心一横设计个更劲嘅出嚟，结果砌咗呢只海盗船。」笔者未问Ken就主动讲，可见佢心里面团火烧得几咁旺盛。细问之下原来阿Ken只係爱上咗LEGO半年，早期因为本身锺意火车但有感LEGO嘅火车都唔太仔细，所以设计咗架非常精细嘅火车放上去LEGO Idea，可惜呢架火车最后并未得到世界各LEGO Fans嘅青睐。原本笔者以为可以设计出呢只可动嘅海盗船，Ken嘅工作一定同工程有关，但原来佢嘅工作同埋大学所修嘅科目都同工程方面风马牛不相及，加上Ken只係玩咗LEGO咁短时间，令笔者佩服。

海盗船造得非常精细，但代价係要用多好多粒件，难免会令船身增重，所以海盗船郁起嚟间唔中有啲唔畅顺，而且两边摇得唔太够高，但係喺冇专用组件嘅前提下设计出嚟，加上只用咗LEGO原装最细果只摩打，做到呢个效果已非常难得。除咗机动部份，成套海盗船设计亦见细心，配合「海盗船」而沿用咗「海盗」为设计主题，船上玩家嘅趣怪表情有刻意选择过，而售票处、机动室及动力组件都有真实地重现，LEGO迷一定会一见倾心。如果大家同笔者一样觉得只海盗船好正，就唔好吝啬你手上一票喇！只要到以下连结，登记个LEGO ID就可以投到，希望下年见到呢只海盗船有得卖啦。

后话：上到Ken屋企，佢畀埋之前设计嘅火车笔者睇，一个字：超级正！

◆ Ken係参考真实设计，比例上同时跟足LEGO火车系列，可以喺LEGO火车轨上面行走。
◆ 除咗可以郁，仲有好多灯。
◆ 车箱可以打开睇到入面啲乘客。

上一篇：LEGO旺角开仓 18大精选必抢积木集合
下一篇：LEGO爱潮流！Adly Syairi Ramly 让当红街